الجرَاثِيم صُوحْبِتْ القرُودَة ...

الجرَاثِيم صُوحْبِتْ القرُودَة ...

خَمسِين عَام وَاحْنَا بمَرْض "البُوسَكُّوتْ" مِبليِّين

ملِّي عندُو "كُرزَة" للِّي جَاب فَرخ فِالستِّين

نِخدمُوا وِافَّامْنَا مسكَّرة وزِيد مَقهُورِين

وهَابطَة علِينا عصَاة الذلّ والطّحين

مُفكّرِين وجَامعيِّين وصحَافيِّين وفنَّانِين وحتَّى مسؤُولِين

ولَا حدّ لقالنَا دوَاء يِشْفِينَا ويخلِّينا مِرتاحِين

ويخفِّف علِينا الحمِلْ إلِّي مَازِلنا هازِّين

لِينْ عَمْنَاوِلْ هدَاوْلنَا "حِرْز" مَكتُوب بِدَم المَظلُومِين

رتَّحنَا مِن هَالمَرْض وخلَّانا نِخدمُوا شَايخِين

آما خسَارة تدَعْثِرنَا وطُحنَا فِي زِبلَة معبّيَة بالنَّهضَويِّين

ومَعاهُم كَمشَة جرَاثِيم يقُولُولهُم فَزَّاعَة ومُلتحِين

***

الحقِيقَة مشَى فِيبَالنَا مَرْض مُؤقّت يُوفَى بَعدَ حِين

ومِن سلَاح ضدّ السُّلطَة، هالرّهُوط ماعَندهُم فِين هَاربِين

آخِي لقَاوْ الحّلّ إلِّي مَاكُنَّاش بِيه دَارِين

وعَدَّاوْ أيَّامَات مَع قُرُودَة مِن خِيرَة الحَاضِنِين

والجُرْثُومَة إذَا تقَابلِت معَ القِرْد تولِّي مِن أَشرِس القَاتلِين

ولَا يفِيدْ فِيهَا لَا دوَايَات ولَا طُبَّة ولَا حتَّى عزَّامِين

وآهَوْكَا إسألُوا جمَاعة السِّيدَا وتَوْ تَلقَاوْ الجوَاب المُبِين

الحَاصِل هَالفُرُوخ ولَّات عَندهُم منَاعَة ويَاسِر قويِّين

ويحِبُّوا يمَشِمْشُونَا وعِينِينَا تُخزِرْ ولَّا يردُّونَا رَجعيِّين

وفرِيسِتْهُم كُلّ مِن عَندُو لِمَرْض "البُوسَكُّوتْ" حَنِين

والبقيَّة إلِّي كِيفْنَا رصَّاتِلهُم فِي عَمليَّات تَجمِيل بِدبُّوس وسكِّين

***

مِن علَامات هَالمَرْض الجدِيد إنِّك تولِّي مغمِّض العِينِين

علَى جمِيع قضَايا الزّواولَة والبطَّالة وحتَّى الجِيعانِين

وتبنْدِر فِالأَخبَار لسِيدي الغنُّوشِي وغُلاَمُو بُوعُرضِين

أيَّا قُلنَا نِشكِيو لطبيب قرطاج إلِّي بِهالأَمْرَاض هُو سِيد العَارْفِين

آخِي طلَعْ مِسكِين "طَرْطُورْ" وكِيفُو فِالدِّنيَا مَاتلقَاش إثْنِين

تقُولْ يخدِم فِالكشَّافة وفِالشَّهر يَعمِل خَرجَة ولَّا خَرجتِين

***

هُو صحِيح إذَا تقَابلِت الجَراثِيم معَ القُرودَة نكُونُوا مِالخَاسرِين

وتُمرِضْ برشَة مِالأصوَات الحُرَّة إلِّي علِيهَا معَمّلِين

آمَا مَانَاش بَاش نسلّمُوا حتَّى لَو كُنَّا مِالمَيّتِين

ومَهْمَا تكَاثْرِت الجَراثِيم ومَهْمَا كُثرِت جَحَافِل القُرُودَة المسّخِين

مَنسلّمُوش فِالقضِيَّة ومَاناش سَاكتِين

وقَاعدِين علَى قلُوبهُم ومَانَاش هَاجِّين

ولمَرْض "البُوسَكُّوتْ" مانَاش طَايحِين

وآهَوْكَا إسألُوا علِينَا أصْحَاب السُّلطَة السَّابقِين

عــمُـــرهَــا الــبهِـــيـــمَـــة مـــاتـــجِـــيــب غـــزَالَـــة

عــمُـــرهَــا الــبهِـــيـــمَـــة مـــاتـــجِـــيــب غـــزَالَـــة

الطاء.. طَاحْ وتكَبْ وفِي زُوز مِيترُو تِقلِبْ وقَال هَاتُولِي ورقَة وقلَم نفَصِّل بِيهُم النّصِيب إلِّي كتِب .. هَاتُولِي حبَارِي .. هُو سلاَحِي .. بِيه نجَاوِب كُلّ مِن فِالمُوتَى يحَارِب.

الألِف .. آش فَصِّلت مِن كلاَم وكتِبت .. ولاَ نهَار حيّ ولاَّ ميِّت تَخيِّلت إنُّو أولاَد بلاَدِي إلِّي توَسِّمت فِيهُم الخِير ومَا بدِّلت .. ومشَى فِيبَالِي يجِي نهَار ونحصِد كُلّ مَا فِيهُم زرَعت .. يخُونُونِي وبِيدِيهُم تِغدَرت.

الهَاء .. هانُونِي وفِي قَبرِي مرمدُونِي .. وفِالحُفرَة إلِّي فِيهَا حطُّونِي مَا خلُّونِي نِرتَاح وزِيد سبُّونِي .. هَالكَمشَة جرَابِع .. يحبُّوا مالتَّارِيخ يفسّخُونِي.

الرَّاء .. رِيتهُم بعِينيَّا .. أصحَاب العَملَة الدُونيَّة .. رهُوط تِشبَه للحيَوانَات بَرشَة مُوش شويَّة .. كَمشَة جُهَّال بعَادْ عَالإنسَانيَّة .. وَاش جَيِّبهُم ليَّا .. سمَعتهُم بوِذنيَّا يشَوّهُوا فِي سِيرتِي ويذلُّوا فيَّا بِكلاَم امَّسخْ كِيفهُم .. شلَّة مِن دُعَاة الضلاَمِيَّة.

الحَاء .. حسِّيت بوجَايِع حَرقِتلِي جَاشِي .. رِكبِتنِي غُصَّة مِنهَا مَا نِبرَاشِي .. ومَا غَاضنِي كَان شَعبِي إلِّي مشَى فِيبَالِي مَا يِنسَاشِي .. شكُون إلِّي علّمُو وَقت إلِّي هُو مَا يَقرَاشِي.

الدالْ .. دَاء صَابنِي وصَاب إلِّي كِيفِي جُمليَّة .. جَراثِيم تَاكل فيَّا تَحت الّلحُود والسُّلطَة النَّهضويَّة مِتشمتَّة فيَّا .. ياوخيَّانِي ما كُنت نهَار نِتصَوِّر إلِّي بَاش يَنكّلُوا ويبَدّعُوا بيَّا .. أحفَادِي إلِّي يَامَا علَى خَاطِرهُم حفَات ساقيَّا.

الألِف .. آلاَف .. وآلاَف يعرفُونِي وضدّ حفَّارة القبُور وقفُولِي ومَا طيّشُونِي .. خاطِرهُم أحرَار بلَادِي إلِّي عمُرهُم مَا نَكرُونِي.

الدالْ .. دَرس تعلّمُوه يَا سَامعِين القُول ويَا قوَّالَة .. النّهضة مايبَانِش فِيها لَو تِسقِيهَا مِالعسَل سبَّالَة .. آمَا الكَلب إذَا تسَنّسُو وتعَشِّيه مِالجرفَالة قِروَالَة .. يبَات يعِسّ علِيك وعلَى السَّاس إلِّي تِبنِيه .. والبَنِي هَا النّهضة مَايجِيش عَالزبَّالَة .. وعمُرهَا البهِيمَة ماتجِيب غزَالَة.