يَا مِتْعَدِّي
علَى بِنْت النَّاس .. بِنْتِك رَاهِي فِالثنِيَّة
حَرْڨِي
نَايَا على حُرّة مفتّحَة نوَّارة في عشيّتها
حُكْمُوهَا
مِالبُوليسيَّة ثلَاثة ومرْمدُولهَا عِيشِتها
هوايِشْ
صَايِبهَا الكلَبْ ومِن حبِيبهَا فكُّوها
مَشمشُولْهَا
لحِيمتهَا فُوق السَّاعة رُبع بعدمَا زَاوُوها
ترَاتحُوا
علِيهَا إثْنِين ومالشِّيخَة زادُوا عَمْلُوا عُولَة
والثَّالث
سَلْسِلْ عشِيرْهَا وخلَّاه يصِيحْ المغبُون كِالمَهْبُولَ
***
الوردَة ذِبْلِت
أورَاڨهَا وڨَعدِت فِي ڨلِيبهَا أمَارَة
وعَاشِقهَا
صَابتَّهْ حرڨَة ولِهْبِت فِي جَاشَهْ النَّارَ
يَا الحبِيبَة
ما تِذْرفِي دَمعِكْ وتفَرّطِي فِيه خسَارَة
خلِّيكِي
قويَّة وفِيك كلَاب الداخليَّة الكُل حيَارَة
حرَايِر بلَادِك
مَا نسُوكِ ومَا سلّمُوا وعَزْمُوا عَالثَّارَ
غِير إنتِ
يَا مريم مَا ترخِّي وكُونِي لَبَّة صبَّارَة
***
يَا حلِيلِي
بعْدمَا دزُّوهُولْهَا زادُوا دَخّلُوا فِيهَا غُولَة
هَالمَكْلبَة
وأَسيَادهُم يَعطِيهُم والله ألف بشُّولَة
الغَاليَة
طَلبِت عَدل الحَاكِم، صَبْحِت المَغبُونَة مَطْلُوبَة
طلَع كِي
سِيدِي كِي جوَادَهْ، الكُل رهُوط مريضَة ومَكْلُوبَة
يَا مريم
لَا يهمِّك ومَا تكُونِي مَصدُومَة وَ مَا تخلِّي حَالْتِك مِكْدَارَه
أحْبَابِك
مَا يخلُّوك نهَار تخَاصْمِي وَحْدِك هَالهوايِش المكَّارَه
***
يَا عُرِّة
الرجَّالَهْ، نبَلّغِلْكُم سلَام علَى لسَان زعِيم زَبْرَاطِة حَبس المُرنَاڨِيَّة
يجيبُوكُم
حذَايَا وتذُوڨُوا أَنواع العَصْبَة مِالمَكبُوسَة للطريَّة
وتدُور الأيَّام
يَا بُولِيس يَا ضَالِم ومَا تدُوم رِيح فِي برِّيمَة
واطِّيح ڨُدَّامِي
ونُرْشُمْلِك مَا عندِك مِن ترِيمَة
ويَا متعدِّي
علَى بنَات النَّاس جهَارْ بهَارْ
أُخْتِك وبِنْتِك
رَاهُم فِالثنِيَّة يطلعُوا بدِينَارْ
