مَــدْفُـــونِـــيـــن بِــالْـــحـــيَــا ... آمَــا وَاڨْــفِــيـنْ

مَــدْفُـــونِـــيـــن بِــالْـــحـــيَــا ... آمَــا وَاڨْــفِــيـنْ

شهر وشهرين .. عام وعامين .. وَحْنَا عالهمْ مازلنا صابرين ..

توا عامين وَحْنَا مازلنا حازنين ومازالت وجوهنا صفُرْ ومازلنا باهتين في كمشة مبَعْبصِينْ، ماصْتِينْ لَاصْتِينْ، ناصبين محفِل وفيه متربّْعِين يشْوُوا في لحيمتنا وبيها متعشين وشايخين تڨُولْ يوم عيد وبيه زاهين وخُوتِي في تالة والرديف وبن ڨردان شاعلين رجالة ونساوين مغلغلين وللنظام إذا راد الڨاضي مطيحين ..

توا عامين وَحْنَا مازلنا محتحتين ومريشين ومازالت حالتنا منيّْكة أصل ومازلنا مهنتلين ومحڨورين وبالحيا مدفونين في أرض حْنَا ليها خادمين وبخيراتها ماناش متمتعين وعليها ماناش عايشين آما لذراعاتنا مازلنا مشمرين وماناش مسلمين وماناش مؤيسين وڨبَرْ النظام حْنَا ليه حافرين رغم كيد الكائدين ..

توا عامين وَحْنَا مازلنا معذبين ومازالوا الموتى والحيين مغمورين ومنسيين ومازالوا أصحاب السلطة بيهم موش لاهين وڨارنين الراس عالراس عالزوالي المسكين وعلى ظهره طالعين ويديهم في مكاتيبه حاطين وعالتفتيف ناوين عيني عينك وماهمش حاشمين آما مازلنا فايقين وماناش راڨدين وماناش ساكتين وعلى تطييحهم معملين ..

توا عامين وَحْنَا مازلنا ضايعين ومازالوا الكلاب على صدورنا باركين ومازالوا لوجوهم مادين ولشعبنا، صبحة وعشوة وفي كل دشرة، ذالين ولسعده كابين وما همش فاهمين إلي كل مايزيدوا نهار عالكرسي ڨاعدين كل ما يزيدوا يتحرڨوا بالنار إلي تحته حْنَا مولعين ويكونوا عن قريب من أنذل الخاسرين وهذيكا نهايتهم ووهذاكا آش باغين ..

شهر وشهرين .. عام وعامين .. وَحْنَا مازلنا موش راضين على معارضين مازالوا للواقع موش فاهمين ومازالوا بينا موش حاسين وفي فضلة السلطة طامعين وافامهم ليها حالين آما مازلنا النوارة عاقدين في جبهة عندنا معاها عشرة وبيها فرحانين غير بركه ماتزيدش تفلِّتْ آخر فرصة بعد ما ضيعت فرصتين وتنتصر لشعب الكادحين وكي نبرّْكُولها النظام غير تكُون هيَ ذابحته بامْذَى سكِّين  ..

شهر وشهرين .. عام وعامين .. ومهما طوالت الأيام والسنين .. حْنَا مازلنا شادين صحيح وماناش راكعين ومازلنا نتكلموا وماناش ساكتين وعالسلطة ماناش فاكين وڨلبها عن قريب واكلين .. غير ڨولوا آمين ..

طــلّع شكُون .. تِــربــح الــقَــصْــبَــة

طــلّع شكُون .. تِــربــح الــقَــصْــبَــة

نَا مدلّل الحكومة وسِيد النَّاس

هِيدُوڨْ الشّيخ وعلى قصبتَهْ عسَّاس

الشرف نسمع بيه وما نكساباش

وحرفة التلحيس والطحين ما نبدلهاش

الحكومة ڨتلي اخدم لينا قواد ولا بوليس

وعلى الحق نبغيك ديما بارك كي بوتليس

ڨلتلها نا خديمك مالصباح حتى العشية

غير إنت يا تاج راسي وفِّيلي في المهبة شوية

الحكومة ڨتلي اخدم لينا كريطة ولا حمار

وعلى المعارضة نهِّڨ يا بهيم ليل مع نهار

ڨلتلها نا عبدك نهزك على ظهري الضريِّف

غير إنت يا للَّاتي زيديني في العلفة طريِّف

الحكومة ڨتلي اخدم لينا صبَّاب ولا مرشْ

وعلى المعارضة بُول وآخْرَى حتى لين تتهش

ڨلتلها نا كلبك وعضتي مسمومة ما تداواش

غير إنت يا الغالية أعطيني كل شيء بوبلاش

الحكومة ڨتلي اخدم لينا نعُوشة ولا بومة

وعلى المعارضة غوِّث وهنتلهُم في كل حومة

ڨلتلها نا فرخك نشري في خاطركم البلاء

غير إنت يا لميمة إكتبيلي فوڨ الأرض الهواء

الحكومة ڨتلي اخدم لينا مُغرِّق وكمْبَاص

وعلى المعارضة عفِّس وارْفِس يا غفَّاص

ڨلتلها نا شلاكتك نشوي لا رحمة ولا شفقة

غير إنت يا حنينة طوْليلِي في هآك الوفقة

نا شاوش الحكومة و "عيوني" لا تنام

سلاك الواحلين من تالي ومن ڨدام

واليوم الخليفة نفِّسني و"فتحلي" الباب

وسمَّاني على عرشه بآش كتَّاب

آيا طلعتوني يا خراوات .. ولا نطلع بيكم نجري لباب بنات ؟!