النَّهضة والسِّبسي

النَّهضة والسِّبسي

 بِينْ النَّهضة والسِّبسي مَا تُڨْعِد حَايِر

يَاوْ تَلِّفهُم الإِثنِينْ وخلِّيك دِيمَا ثَايِر

عَالنَّهضة والسِّبسي .. هَايْ ...

الدُّستُورِي والنَّهضَاوِي ماهُمشِي ضرَايِر

يَاوْ مِحرَاثهُم في أرْضِك دِيما غَايِر

الدُّستُورِي والنَّهضَاوِي .. هَايْ ...

 ***

أوِّلهُمْ كَلب سِبُّوهْ مَلعُون مِن دُون جِيلَه

بالسِّينْ لَا تنَادُوهْ إذَا فِيكُم صمِيلَه

وفِي السُّلطَة عزُّوهْ، للزِّبلَة رَاوْ مفَارِڨْ رحِيلَه

وإذَا نطَق لَا تلاغُوهْ، لَا تصِيبْكُم الَّلعْنَة مثِيلَه

عَالدُّستُورِي .. هَايْ ..

خرِفْ وهتِرْ يَاوْ طَرّْدَهْ شعْبِي

وبَعد أيَّامْ الرَّخَاء يَاوْ جَاتَهْ أيَّامْ الكَرْبِ

***

ثَانِيهُمْ نَذْل، العِيشَة معَاه مرَارِتْ ويَا ويلَهْ يُوم الملَامَة

علَى يدِينْ الزوَّالِي يذُوڨْ الغَصرَاتْ ومَا تَنفعُوشْ النِّدامَة

يَاوْ منزُوسْ بَاعْ أصلَهْ وعَرضَهْ وتبَّعْ الكُرسِي في مَرْضَاتَه

وأمْرِيكْيَا الملْعُونَة يَاوْ خيّبِتْلَهْ ذَاتَه

وفِي الولَايَاتْ العصَا باشْ تكسِّرلَهْ يَاوْ جمِيعْ عظَامَه

وهذِي آخِرة خَايِن الثَّورة، يَاوْ صدَقْ الشَّعب فِي كلَامَه

عَالنَّهضَاوِي .. هَايْ ..

آخِرتَهْ محبُوس وفِالدبُّو مخبِّي

ورخِيصْ بِين النَّاسْ يَاوْ مِثل الكَلْبِ

***

يَالِّي نَاوِي تُحكُمْ إِسمَعْنِي كَان فِيكْ عقَلَّا

بَعْد الدّساترَة والخوَانجيَّة إلِّي صَابِتهُم عِلَّة

لَا تَاكِلْ فِي يُوم الغلَّة وتسِبْ المِلَّة

وأُحفضْ لسَانِك عَالغَرَرْ والزلَّة

رَاوْ الأيَّامْ مَا دَامِتشْ لزَعْبَعْ ولِلَّا

الحجَّامة والطرَابِلسيَّة الكُلَّا

واليُوم دَارتْ علَى جميعْ وخيَّانْ زَعْبَلَّا

إلِّي دخلُوا الشَّعب والبلَاد في حِلَّه

***

يَا رَاقِدْ فِزّْ ثُورْ رَاكْ ترَاخِيتْ والوَڨْت فَاتِك

ثَورة الجُوع ضامنَة الرِّبح وهِي ذخِيرْتك فِي حيَاتَك

ونوصِّيكْ أُهْرب ماِلشَّبعْ وفِالخِيرْ يَهنَى مباتِكْ

هذِي نصِيحَة من بطَّال مهبُول وفِي منُّوبَة مبَاتَه

تَاركْ الزوَّالِي لَا تجَاورُوهْ ولَا تاخذُوشِي بنَاتَه

وإذَا جَاء للجَمْع لَا تلَاغُوهْ، لَا خِيرْ فِيهْ ولَا فِي حيَاتَه